مصر شيكا بيكا ........

on Sunday, March 9, 2014

كثيراً ما أكتب رغم أن نفسي تعاف الكتابة بغرض التأريخ ..
يوماً ما سأعيد قراءة ما كتبت ..
وسأدرك وقتها مدي حكمتي في تأريخ كل هذه الأحداث ..
التأريخ مهم في فترة سوداء يكتب تاريخها المنتصر ..  
ويصول ويجول بقلمه وسوطه يلوي عنق الحقائق ويغير مبادئ المرء وقناعاته طوعاً أو كرهاً ..
التأريخ مهم ولو أعتقد الفراعنة الجدد مثل الفراعنة القدامي أن محوك للاسماء والأحداث يعني سيطرتك علي التاريخ ..
التأريخ مهم ولو كان حواراً بيني وبين سائق تاكسي ..
خذوا العبرة بالخواتيم التي لم نبلغها بعد ......
===
أؤمن دوماً بإن المنطق قادر علي إخراس الآخرين ...
المؤسف مؤخراً إنني أكتشفت إنني أحمق ..
وأن المنطق قد يجابه بألف وسيلة ... أبسطها حالة ( هو كداااااا وآخرك أعمله )
أنتحر المنطق علي مذبح العقل المغلق كمصد الريح لسائق تاكسي جمعتني الظروف واياه في مشوار استغرق نصف ساعة ..
كنت قد قرأت خبراً في المصري اليوم قبل ركوبي التاكسي بدقائق مفاده التالي :
وفي طريقنا مررنا علي منطقة مظلمة تماماً تعلن بوضوح أن مصر تعاني أزمة حقيقة بإنقطاع الكهرباء في فصل الشتاء حيث لا إستهلاك أساساً ..
فقلت قريت حضرتك خبر رفع أسعار الكهرباء الفترة الجاية ..
فأجابني بعد صمت لحظة : لأ ..
ثم أستطرد : هو حضرتك إخوان ؟؟
فتعجبت للسؤال الذي لا علاقة له بما قلت .. لكن أجبت بإبتسامة : لأ ليه ؟؟
فهز رأسه بصمت ولم يجيب ..
فترة من الصمت كنت أحاول فهم مغزي السؤال .. وعلاقته بما ذكرت .. وحين لم أجد إجابة  لعب شيطان العناد برأسي فقلت : هو حضرتك إخوان ؟؟؟
فقال في سرعة من يدرأ تهمة بشعة : لا لا ...
فواصلت : أمال سألتني ليه وسكت ؟
قال : أصل الإخوان هم اللي – لا مؤاخذة – بينشروا اشاعات ..
أخطر حاجة علي البلد اليومين دول الاشاعات دي .. عاوزين يكرهوك في الحكومة !!!
ابتسمت وقلت مفسراً : الخبر اتنشر في ( المصري اليوم ) ودي آخر جريدة ممكن تتهمها إنها إخوان علي فكرة ...
فهز رأسه بغير إكتراث بـ ( كلامي الفارغ ) مؤكداً في ثقة : إشاعات يابيه كلها ..
فقلت له  : عموماً هو النور بيقطع  في الشتاء وده في حد ذاته كارثة .. امال في الصيف حنعمل ايه ..
هنا لاحظت ضبطه لنفسه علي موجة  تجاهل ما لايروقه .. فلم يعلق ..
ثم لم يلبث أن مد يده بحفنة من ( اللب ) لنتشارك سوياً (اللب والملح )  
ثم أستأنف الحوار قائلاً : البلد دي مش حتقوم إلا لما نبطل إشاعات ورغبة في تدميرها ذاتياً كده  !!!!
تماسكت بصعوبة وقلت : تعال نتفق علي إننا مصلحة واحدة .. انت كراجل سواق تاكسي يهمك ايه ؟ يهمك كمثال ان الزحمة دي متبقاش موجودة .. يهمك الشوارع تبقي متسفلتة نضيف وحالتها كويسة ..
قالي مهو مش ذنبنا بقي الناس زمان معملوش حسابهم علي الزحمة دي .. الزحمة دي مسئولية الناس اللي مبصوش لقدام ..
قلت له تماااااااام يبقي مفروض نبص لقدام ونعمل لسنين طويلة قدام .. متفقين
اديك مثال بسيط ان الحالة الحالية هي هي من مليون سنة وان برضك لسة نفس الشغل ونفس الاسلوب ..
لاحظت انت ان فيه حركة رصف وسفلتة لشوارع كتيرة قوي .. قالي اه تمام حاجة زي الفل ..
قلت له : ابداً .. دلوقتي الناس بتيجي تجرف الشارع من النص مطرح ما العربيات بتمشي  .. وتسيب الجوانب زي ماهي.
 قال : اه .. معلش مهو مفيش فلوس يسفلتلك كويس ..
قلت: يبقي يستني يا عم .. الناس صابرة علي القرف .. مش لازم تلفقلها اي حاجة والسلام ويبقي محسوب عليهم حاجة حتتعبهم أكتر..
 يعني الشتاء الجاي حتلاقي مع شوية مطرة المية اتكومت علي جوانب الشوارع  وعملت برك وحمامات سباحة في الشوارع والناس حتتضرر اكتر يبقي كأنك يابو زيد ما غزيت ..
وبعدين مش مسألة مفيش فلوس .. لا ..
مسألة فيه فساد ومفيش رقابة
فلا الطريق بيتخدم كويس ولا حد بيراجع عليه ..
وخدت نفس وقلت له : زي مترو مدينة نصر ردموا عليه بكام الف طن رمل وبعدين شالوا الرمل وطلعوا الحديد !!!!
يعني اتكلفت الدولة  نقل اطنان ورفعها للاشئ .. كل ده غياب تخطيط وفساد ونفس اللي بيحصل زمان بيحصل دلوقتي ..
هنا كنت تيقنت أن منطقي أجهز عليه فلن أستمع لتبرير من أي نوع .. لكني كنت مخطئاً ..
حيث مد يده قائلاً : تصدق بالله يا استاذ .. لو فيها ايه برضك لازم نقف جنب الراجل الجاي ده ونقوله احنا معاك .. حتي لو عمل حاجة احنا شايفينها غلط .. لا اكيد هو شايف بحكمته اللي احنا منعرفوش .. يبقي لازم نؤيده في الغلط قبل الصح !!!!!!
قاومت بصعوبة التلفظ بلفظ خارج .. وآثرت السلامة فقلت : هو مش السيسي طلب نتقشف والناس برة تتبرع بشهر عشان مصر .. نتقشف زيادة عن كده ايه ؟؟
طب ما بلاش .. ما اولي بقي اول ما يمسك يطبق الحد الأقصي .. فقالي : ناويين ان شاء الله ..
قلت له ناويين ايه يا حج .. الحد الأقصي اتطبق بالفعل .. واستثنوا منه حكومياً البترول والتعدين والجيش والقضاء والشرطة ..
قال : ماهو استني بقي دول الخبراء والمستشارين .. ناس عارفين كل حاجة وبيزغللوا عينيهم بالفلوس برة .. متيجي واديك مليون ..
قلت له والله اللي كده بالسلامة ..
هو مش السيسي قال لازم نشتغل عشان مصر ؟؟؟ واحد شايف الفلوس احسن من انه يضحي عشان البلد .. يتفضل بالسلامة ..ونوفر فلوسه للغلابة ونشوف حد تاني محترم وطني يرضي يقلل فلوسه ويشتغل عشان البلد ..
انما اجي علي  اهل بلدي وادي واحد مليون في الشهر عشان خبير !!!! وبعدين ايه الخبرة في الشرطة والجيش ؟ ولا القضاء ؟؟
كان ضغطي ابتدأ يرتفع الصراحة .. لكنه أصر أن يجهز علي نهائياً قبل أن أتركه قائلاً : بص يابيه : والله لو ايه .. يعملوا اللي يعملوه .. ماهي خربانة كده كده .. تخرب وناكل منهم ولا تخرب ومناكلش اصلاً !!!
ان شاء الله السيسي يكسب ويعمل اي حاجة واحنا وياه !!!!!!
الحمدلله إني نزلت بقي ..

إتضح أن المنطق يتم إغتصابه وذبحه علي قارعة الطريق وإننا

( غلابة قوي يا خال ) .........

4 تعليقات:

خمسة فضفضة said...
This comment has been removed by the author.
خمسة فضفضة said...

ياريت الناس تبقي فاهمة زيه كده يا مهاب
لو مافيش بلد مش هايبقي فيه حاجة خالص لا حد ادني وﻻ شوارع اصلا عشان نسفلتها
مرحلة منيلة بنيله وﻻزم نعديها
والتخوين عمال علي بطال ماينفعش، كلنا بقينا ف مركب واحده ومصلحتنا واحده واللي هايحاول يخون او يلعب بديله هاتغرق بينا كلنا
الناس الموجوده مش وحشه،مش احسن حاجة بس احسن الموجود،نتعكز ع بعض ونعدي اللي احنا فيه ولا نكسر مقاديف بعض ونغرق كلنا،ومش هارجع واقولك بص لسوريا ولا ل ليبيا وﻻ حتي لليمن اللي بقت 6 حتت وبيتخانقوا مع بعض عشان انت اكيد شايفهم من غير ماقول

Ccbcbcbc said...

هههههههههههه معاك حق والله فيه من دول كتير عندى فى المنوفية

Anonymous said...

شعب غلبان والله و متشعلق بعيدان الامل يا معتز , شعب بيتمنى السيسى يكون منفذه و للاسف الواقع مختلف , ربنا يسترها , اكتر حاجه مضايقانى انى ممكن اتظاهر مع ذوات الاربع

عزه عارف

Post a Comment